መጽሐፍ ቅዱስ መሆን ያለብንን የሚወስነው እግዚአብሔር እንደሆነ ይነግረናል። መጽሐፍ ቅዱስ በሚገርም ግልጽነት ሲናገር “ክፋትን ሁሉ አስወግዳችሁ ርኅሩኆች ሁኑ ይላል”። “ብትችሉስ ርኅሩኆች ሁኑ አይደለም የሚለን”። ወይንም “ወላጆቻችሁ ለእናንተ ርኅሩኆች ከነበሩ . . .” ወይንም “ችግር ኖሮባችሁ ወይንም ተበድላችሁ የምታውቁ ካልሆነ. . .” አይልም ነገር ግን “ርኅሩኆች ሁኑ” ነው የሚለው።

ይሄ በሚያስደንቅ መልኩ ነፃ ያወጣናል። አንዴ ተወስኗል ለውጥ ማምጣት የማይቻል ነገር ነው ብሎ ከማመን መጥፎ አስተሳሰብ ነፃ ያወጣናል። ያለፈ ታሪካችን መጨረሻችን ነው ብሎ ከሚያምንም አስተሳሰብ ነፃ ያወጣናል።

እስረኛ ብሆን እና ኢየሱስ ወደታሰርኩበት ክፍል መጥቶ “ይሄን ቦታ ዛሬ ማታ ለቅቀህ ውጣ” ቢለኝ ግራ ልጋባ እችላለሁ ነገር ግን መልካምነቱን እና ኃይሉን የማምን ከሆነ ነፃነት የሚቻል ነገር እንደሆነ ተስፋ ይሰማኛል። ካዘዘ ሊያደርገው ይችላልና። 

ሌሊት ቢሆን እና ማዕበሉ በኃይል እየተናወጠ ኢየሱስ ወደ እኔ መጥቶ “ነገ ጠዋት ወደ ማዶ እንሻገራለን” በዚያ ለሊት ተስፋ ይፈነጥቃል። እርሱ እግዚአብሔር ነው። የሚያደርገውን ያውቃል። ትዕዛዞቹን ለማለት ያህል የሚላቸው ቃሎች አይደሉም።

ትዕዛዞቹ ነፃ ከሚያወጡ ሕይወትን ከሚቀይር እዉነት ጋር ነው የሚመጡት። ለምሳሌ 

እርስ በርሳችሁም ቸሮችና ርኅሩኆች ሁኑ [ይሄ ትዕዛዝ ነው] ፥ እግዚአብሔርም ደግሞ በክርስቶስ ይቅር እንዳላችሁ [ይሄ ደግሞ ሕይወትን የሚቀይር እውነት] ይቅር ተባባሉ። እንግዲህ እንደ ተወደዱ ልጆች [ሌላ ሕይወትን የሚቀይር እውነት] እግዚአብሔርን የምትከተሉ ሁኑ [ሌላ ትዕዛዝ] ፥ ክርስቶስም ደግሞ እንደ ወደዳችሁ ለእግዚአብሔርም የመዓዛ ሽታ የሚሆንን መባንና መሥዋዕትን አድርጎ ስለ እናንተ ራሱን አሳልፎ እንደ ሰጠ [ሌላ ሕይወትን የሚቀይር እውነት] በፍቅር ተመላለሱ [ሌላ ትዕዛዝ]። (ኤፌሶን 4፡32-5፡2)

በእነዚህ ቃሎች ውስጥ ሕይወትን የሚቀይር ኃይል አለ። እስቲ ይህ ኃይል እንዲቀይራችሁ እየጸለያችሁ ከኔ ጋር አሰላስሏቸው ።

1. እግዚአብሔር ልጆች እንድትሆኑ አድርጓችኋል

አዲስ አባት እና አዲስ ቤተሰብ አለን። ይሄ በዕድል የሚያምኑትን የቤተሰብ አመጣጥ ይሰብራል። “አባታችሁ አንዱ እርሱም የሰማዩ ነውና በምድር ላይ ማንንም። አባት ብላችሁ አትጥሩ” (ማቴዎስ 23፡9)።

አንድ ጊዜ አንድ ወጣት ልጅ እግዚአብሔርን እንደ አስቸጋሪው አባቱ ሊያስብ እንደማይገባው ያሳመነውን ዕብራውያን 12፡10-11 እንባ ባዘሉ ዓይኖች እና በታላቅ ደስታ ሲጠቅስ ሰምቼዋሁ። 

እነርሱ (የምድር አባቶቻችንን) መልካም ሆኖ እንደ ታያቸው ለጥቂት ቀን ይቀጡን ነበርና፥ እርሱ ግን ከቅድስናው እንድንካፈል ለጥቅማችን ይቀጣናል። ቅጣት ሁሉ ለጊዜው የሚያሳዝን እንጂ ደስ የሚያሰኝ አይመስልም፥ ዳሩ ግን በኋላ ለለመዱት የሰላምን ፍሬ እርሱም ጽድቅን ያፈራላቸዋል። (ዕብራውያን 12፡10-11)

እነእርሱ ይህን አደረጉ. . . እርሱ ግን ያንን አደረገ። ይሄ እውነትን የሚቀይር እውነት ነው። ምንም አይነት ምድራዊ አባቶች ቢኖሩን ይህን እውነት ልናውቀው ፣ ልናምነው እና ልንቀየርበት እንችላለን። እግዚአብሔር ስለ አባትነቱ ያለንን አስተሳሰብ ለመገለባበጥ እራሱን በቃሉ ገልጾልናል። እንደ ሌሎች አመጣጣችን የተበላሸ ነው ብለን ማሰብ የለብንም።

2. እግዚአብሔር እኛ ልጆቹን ይወደናል 

እኛ “የተወደዱ ልጆች” ነን። የእግዚአብሔርን ፍቅር እንድናስተጋባ የተሰጠን ተዕዛዝ እንዲሁ በአየር ላይ ያለ ሳይሆን “እንግዲህ እንደ ተወደዱ ልጆች” ከሚል ኃይል ጋር የመጣ ነው። ትዕዛዙ “ውደዱ” ነው ኃይል የሚሆነን ደግሞ “መወደዳችን” ነው።

3. እግዚአብሔር በክርስቶስ ይቅር ብሎናል

እርስ በርሳችሁም ቸሮችና ርኅሩኆች ሁኑ፤ እግዚአብሔርም ደግሞ በክርስቶስ ይቅር እንዳላችሁ ይቅር ተባባሉ። እግዚአብሔር ለእኛ ያደረገልን ለመለወጥ ኃይል ይሆነናል። ይቅር ብሎናል። ይሄ የፍቅር ግንኙነትን እና የወደፊት ተስፋን ይከፍታል። ርኅሩኅ መሆን ሳይገባን በመወደዳችን ምክንያት ከሚትረፈረፍ ልብ እና ለዘላለም ከመጠበቃችን ምክንያት አይፈስምን? ርኅሩኆች እንድንሆን የተሰጠን ትዕዛዝ እግዚአብሔር ከእናት እና አባታችን በላይ ካደረገልን የሚበልጥ ነገር የዘለለ ነው። ላለፈ ሕይወታችሁ ባሮች አይደላችሁም።

4. ክርስቶስ ወዷችኋል እራሱንም ስለእናንተ ሰጥቷል

“ክርስቶስም ደግሞ እንደ ወደዳችሁ በፍቅር ተመላለሱ”። በፍቅር እንድንመላለስ የተሰጠን ትዕዛዝ እንደተወደድን ከሚገልጽ ሕይወትን ከሚቀይር እውነት ጋር ነው የመጣው። እንድትወዱ ዕድል በምታገኙባቸው ጊዜያት ማንኛውም ድምጽ መጥቶ “አንተ እኮ መውደድ የምትችል ሰው አይደለህም” ቢላችሁ እንደዚህ በሉት “ክርስቶስ ለእኔ ያለው ፍቅር አዲስ ሰው አድርጎኛል። እንድወድድ የሰጠኝ ትዕዛዝ እንደሚወደኝ እንደሰጠኝ ተስፋ ሁሉ እርግጥ ነው።”

ልመናዬ፣ ነገሮች አንዴ ከሆኑ በኋላ ሊቀየሩ አይችሉም የሚለውን አስተምህሮ በመሉ አቅማችሁ እንድትፋለሙት ነው።  ለውጥ የሚቻል ነገር ነው። በክርስቶስ መምጣት ፍጹማን እስክትሆኑ ድረስ ፈልጉት።

Originally Posted at DesiringGod.org, Translated by Joshua Terefe